Një ngjarje tejet shqetësuese ka ndodhur në mëngjesin e të mërkurës në qytetin e Prizrenit, konkretisht në shkollën e mesme të mjekësisë “Luciano Motroni”.
Një nxënës nga komuniteti boshnjak ka kërcënuar me vrasje përmes mesazhit nxënësit e një klase.
Për këtë rast të kërcënimit drejtori i shkollës menjëherë e ka paraqitur rastin në Policinë e Prizrenit.
Albanian Education ka kontaktuar me drejtorin e shkollës “Luciano Motroni”, Mehdi Krasniqi, i cili ka treguar si ka ndodhur rasti.
Drejtori ka thënë se nxënësi nga komuniteti boshnjak ka komunikuar me dy nxënëse përmes rrjetit WhatsApp të cilave ju ka shkruar mesazhet kërcënuese dhe ato e kanë njoftuar.
“Sapo i kam parë mesazhet kërcënuese që kanë qenë të shkruara në gjuhën boshnjake dhe angleze, kam njoftuar policinë dhe ju kam dhënë mesazhet që nxënësi ka shkëmbyer me dy nxënëset. Më pas kam biseduar edhe me prindin e nxënësit dhe ai e ka konfirmuar se djalin e tij e ka dërguar për kontrolle në Graçanicë, pasi ka probleme shëndetësore. Por duhet thënë se reagimi i shpejt ka bërë që asgjë mos të ndodhë dhe tash policia po merret me rastin”, ka thënë drejtori Krasniqi për Albanian Education.
Drejtori Krasniqi ndërkaq ka mohuar që në mesazhe, nxënësi të ketë shkruar se do ta vras edhe atë, siç kanë raportuar disa media.
“Në mesazhe ai ka kërcënuar me vrasje vetëm nxënësit e një klase, por jo edhe mua. Unë kam biseduar edhe me prindërit e nxënësve, emrat e të cilëve i ka shkruar në mesazh nxënësi kërcënues dhe ju kam treguar krejt ngjarjen”, ka thënë drejtori Krasniqi.
I pyetur se a do të lejojnë kthimin e nxënësit në shkollë apo si do të veprojnë, drejtori ka thënë se vendimin do ta marrin bashkë me Drejtorinë e Arsimit në Prizren. /Albanian Education/
Nxënësi i shkollës në Prizren dërgon mesazhe te drejtori: Kam bërë listën e nxënësve që do t’i vras
