Mësimdhënësja e gjuhës angleze, Festa Shabani Tahiri, ka mbrojtur me sukses temën e masterit me titull “Relevanca e Aktiviteteve Jashtëshkollore në Mësimnxënie”, duke fituar titullin Eksperte e Mësimdhënies dhe Kurrikulës në Fakultetin e Edukimit në Universitetin e Prishtinës.
Shabani ka bërë të ditur se të gjitha provimet i kishte përfunduar me sukses që në vitin 2017, por angazhimet e shumta në aktivitete jashtëkurrikulare, projekte edukative, trajnime, kampe verore, vullnetarizëm, si dhe roli i saj si mësuese dhe nënë, bënë që mbrojtja e temës së masterit të shtyhej për një periudhë më të gjatë.
Sipas saj, hulumtimi i realizuar në tri shkolla të Gjilanit ka dëshmuar se nxënësit që marrin pjesë në aktivitete jashtëshkollore arrijnë rezultate më të mira akademike, zhvillojnë aftësi sociale, komunikuese e organizative dhe fitojnë më shumë vetëbesim.
Ajo ka falënderuar mentorin e saj, profesorin Blerim Saqipi, për mbështetjen dhe udhëzimin profesional gjatë gjithë procesit të hulumtimit, si dhe familjen dhe stafin e Future School për përkrahjen e vazhdueshme.
Ky sukses përbën një tjetër arritje të rëndësishme në rrugëtimin profesional të Festës në fushën e arsimit dhe edukimit.
