Fejton Sylejmani ka përmbyllur me sukses studimet master në Universitetin e Salzburgut në Austri, duke fituar gradën Master i Arteve (Master of Arts) në programin “Marrëdhënie Ndërkombëtare dhe Teori Politike”.
Përmes një njoftimi, Sylejmani bëri të ditur se ky sukses vjen pas tre vitesh angazhim të vazhdueshëm akademik dhe pothuajse një viti pune intensive në përgatitjen e temës së diplomës, gjatë një periudhe të kaluar 1,243 kilometra larg familjes, miqve dhe vendlindjes.
“Tri vite angazhim studentor për t’i përfunduar studimet, e gati një vit duke punuar në temën e diplomës, 1243 kilometra larg shtëpisë, familjes, shoqërisë e njerëzve më të dashur, u konkluduan sot”, ka shkruar ai.
Sylejmani ia ka dedikuar këtë arritje gjyshit të tij të ndjerë, Aga Ali, për të cilin thotë se e motivoi vazhdimisht të ndiqte rrugën e dijes. Mirënjohje ai ka shprehur edhe për familjen e tij – Reshatin, Sadberen dhe Flakronin – si dhe për Adrianën, të cilën e falënderoi për mbështetjen dhe motivimin gjatë gjithë rrugëtimit akademik.
Tema e diplomës së tij fokusohet në proceset demokratizuese në shtetet tranzicionale, duke analizuar nëse zgjedhjet e shpeshta – pesë procese zgjedhore brenda 12 vjetëve – përbëjnë një indikator pozitiv të demokratizimit.
Diplomimi i Sylejmanit në një nga universitetet e njohura evropiane shënon një tjetër sukses të një studenti nga Kosova në arenën ndërkombëtare akademike./ Marrë nga Albinfo.at
