Në fakultetin ku vlerësohet konkurrenca më e madhe për të marrë indeksin e studentit nuk zgjidhen format për t’u pranuar. Për këtë Fakulteti i Mjekësisë ka paralajmëruar kandidatët nga lista e komuniteteve joshumicë se nuk konsiderohen të pranuar deri në verifikimin e përkatësisë etnike nga organet kompetente. Ka dyshime se vendet e tyre në të kaluarën i kanë zënë studentët shqiptarë.
Vit pas viti janë ngritur dyshime e janë bërë denoncime për regjistrimin e studentëve shqiptarë në vendet e rezervuara për komunitetet joshumicë në Universitetin e Prishtinës.
E Fakulteti i Mjekësisë ka paralajmëruar studentët se do të ketë verifikim të etnisë.
“Kandidatët nga lista e komuniteteve joshumicë nuk konsiderohen të pranuar deri në verifikimin e përkatësisë etnike nga organet kompetente”, thuhet në njoftimin e Fakultetit të Mjekësisë.
Sipas burimeve, Fakulteti do t’i dërgojë dosjet për verifikim në Inspektoratin e Arsimit.
Por Inspektorati i Arsimit nuk i ka marrë ende përgjigje lidhur me dosjet që i ka deponuar vitin e kaluar në Prokurorinë Themelore në Prishtinë.
Derisa studentët janë paralajmëruar në konkursin e Universitetit se do të ndiqen penalisht për falsifikim të etnisë, deri më tash institucionet nuk kanë gjetur shkelje, meqë deklarimi i etnisë konsiderohet si zgjedhje e lirë.
Burimet në Inspektorat thonë se problemi i regjistrimit të aplikuesve shqiptarë në vend të komuniteteve joshumicë asnjëherë nuk është zgjidhur.
Në bazë të listës përfundimtare të kandidatëve në Fakultetin e Mjekësisë, në total janë 12 aplikues nga komunitetet me pikë të mjaftueshme për Drejtimin Mjekësi e Përgjithshme e 2 në Stomatologji. Sipas njoftimit, pranimi i tyre do të bëhet pas verifikimit të etnisë.
Ky fakultet është i njohur për konkurrencë të madhe. Sivjet janë pranuar 166 studentë shqiptarë nga Kosova nga 836 sa kanë aplikuar. /KOHA.net/.
