Fakulteti i Edukimit i hap Kosovës rrugën e anëtarësimit në European Education Research Association (EERA)

- Advertisement -

Kosova është bërë kandidate-anëtare e Shoqatës Evropiane të Hulumtimeve në Arsim (European Education Research Association — EERA), pas një pune të pandalshme dyvjeçare nga Fakulteti i Edukimit i Universitetit të Prishtinës dhe institutet e organizatat tjera që merren me arsimin.

Aplikacioni i Kosovës në këtë shoqatë, ndër më të rëndësishmet e fushës së hulumtimeve arsimore në Evropë, është miratuar nga Këshilli i EERA-s, në takimin e zhvilluar në Berlin, më 14-15 mars 2025.

- Advertisement -

Përveç hulumtuesve nga Universiteti i Prishtinës dhe Fakulteti i Edukimit, procesin e anëtarësimit në këtë shoqatë e ndihmuan edhe Instituti Pedagogjik i Kosovës, organizatat joqeveritare dhe një grup më i gjerë i profesionistëve arsimorë të vendit.

Studiuesve kosovarë të arsimit, pranimi i Kosovës kandidate-anëtare e Shoqatës Evropiane të Hulumtimeve në Arsim, do t’u mundësojë pjesëmarrje më aktive në punimet e Konferencën Evropiane për Kërkime në Arsim (ECER), qasje në tarifa të reduktuara, mundësi bashkëpunimi, rrjetëzimi e shkëmbimi të njohurive dhe dukshmëri më të madhe në rrjetet kërkimore evropiane.

Për të qenë anëtare e plotë e EERA-s, Kosova duhet ta krijojë Shoqatën Kombëtare të Kërkimeve Arsimore, një proces që do të udhëhiqet nga Fakulteti i Edukimit i Universitetit të Prishtinës, duke pasur edhe ndihmën e çmueshme të Shoqatës Evropiane të Hulumtimeve në Arsim.

- Advertisement -

Kjo shoqatë ka brenda vetes më shumë se 40 asociacione kombëtare të hulumtuesve të arsimit nga shtete të ndryshme të rajonit dhe Evropës.

©AlbanianEducation.net