Vdekja e mitrovicasit Erion Kajtazi ka tronditur jo vetëm familjen dhe gjithë Mitrovjcën, por të shokuar kanë mbetur gjithë qytetarët.
Për vdekjen e tij ka reaguar edhe kujdestari i klasës Nexhmedin Abazi, profesor në gjimnazin “Frang Bardhi” në Mitrovicë.
Ai theksoi se do ta ketë të vështirë që tani si mësimdhënës të futet në klasë dhe të mos ballafaqohet me buzëqeshjen e nxënësit të tij, Erion Kajtazi.
Postimi i plotë:
Erion, sot, kur po prisja lajme për fitoren në sport, ti u shndrrove në engjëll, ike pa më thënë edhe njëherë fjalët mua si kujdestar klase, fjalët qe e kishe zakon sa herë që takoheshim në klasë e në koridor. Ishe nxënës, djalë i ri, por shumë shpejt u bëmë shokë.
Erion, më tradhtove mua si kujdestarin tënd, shokët, shoqet, na ike herët, shumë shpejt.
Mbetën në gjysmë planet që po i thurje për rrugën e dijes. Isha i sigurt që në fund të kësaj rruge po të prisnin sukseset, djalosh pse u ndale në gjysmë të rrugës, apo Parajsa tu duk më e mirë. Kisha degjuar thënien: “Engjujt nuk jetojnë në tokë!”, por kurrë nuk do ta besoja se t’i kaq herët do të shndrroheshe në njërin prej tyre.
Oh sa e vështirë, unë mësimdhënësi yt të të them lamtumirë, të hyj në klasë e mos të ndeshem me buzëqeshjen tënde Erion.
Prehu në paqe, të qoftë i lehtë dheu i Kosovës!
