Dy shkollat fillore “Naim Frashëri” dhe “Dëshmorët e Kombit” në Podujevë, u kanë bërë thirrje prindërve që t’i dërgojnë fëmijët të hënën në shkollë.
Këto ftesa shkollat i kanë bërë përmes njoftimeve në Facebook.
Në të dy postimet, thuhet se vendimi i Qeverisë Kurti për ndarjen e 50 eurove shtesë ka krijuar rrethana të reja dhe se duhet që të minimizohen humbjet që ju shkaktohen fëmijëve nga greva.
“Duke e pasur parasysh gjendjen e krijuar në arsim dhe në konsultim me DKA-Podujevë ftojmë të gjithë prindërit që nga data 05.09.2022 (e hënë) t’i sjellin fëmijët e tyre në shkollë për t’u pajisur me tekstet shkollore të cilat do të ndahen në të gjitha shkollat dhe njëkohësisht të fillojë procesi mësimor. Vendimi i djeshëm i qeverisë ka krijuar rrethana të reja në të cilat duhet të reflektojmë të gjithë dhe të minimizojmë humbjet që shkaktohen nga greva për fëmijët tanë”, thuhet ndër tjerash në postim.
