Dy nxënës të Innovation Academy, Engjëll Ibrahimi dhe Arnis Kasumi, kanë arritur një sukses të jashtëzakonshëm duke fituar medalje në Olimpiadën Ndërkombëtare STEM, e mbajtur këtë javë në Romë të Italisë.
Sipas njoftimit të akademisë, dy të rinjtë përfaqësuan Kosovën në këtë garë prestigjioze, ku u përballën me nxënësit më të mirë nga dhjetëra shtete të botës. Me paraqitjen e tyre, ata siguruan dy medalje, duke sjellë një tjetër sukses për arsimin dhe talentin e të rinjve kosovarë.
Nga Innovation Academy u vlerësua se ky rezultat është dëshmi e talentit, përkushtimit dhe punës së vazhdueshme të nxënësve, të cilët përfaqësuan me dinjitet Kosovën dhe Vushtrrinë në arenën ndërkombëtare.
Akademia shprehu mirënjohje edhe për Infinit Center, për mbështetjen e dhënë gjatë këtij rrugëtimi, si dhe falënderoi mësimdhënësit dhe prindërit për kontributin e tyre në arritjen e këtij suksesi, duke uruar Engjëll Ibrahimin dhe Arnis Kasumin për rezultatin e shkëlqyer.
