Detaje të reja janë mësuar për ngjarjen e rëndë në Lushnjë, ku një 37-vjeçar ka ngacmuar seksualisht katër vajza brenda perimetrit të shkollës së tyre. Besmir Beqiri, banues në fshatin Rrapëz, ka rënë në prangat e policisë për veprën penale “Ngacmimi seksual”.
Sipas burimeve të gazetares Valbona Davidhi, denoncimi është bërë nga 15-vjeçaret te mësueset dhe psikologet e shkollës dhe më pas është denoncuar në polici.
Bëhet fjalë për ngacmime që kanë shkuar deri te prekja me dorë në rrugë. Madje njërën prej vajzave e ka ndaluar në rrugë dhe i ka thënë se donte të martohej me të.
Njoftimi:
Ngacmoi seksualisht, brenda perimetrit të sigurisë të një gjimnazi, 4 nxënëse, vihet në pranga 37-vjeçari.
Në vijim të masave të ndërmarra për të parandaluar depërtimin e fenomeneve kriminale, në shkolla, si dhe i bashkëpunimit me të gjitha hallkat e zinxhirit të sigurisë në këto ambiente dhe përreth tyre, shërbimet e Komisariatit të Policisë Lushnjë janë njoftuar se 4 nxënëse të një gjimnazi (secila 15 vjeçe), janë ngacmuar seksualisht, nga i njëjti shtetas, brenda perimetrit të sigurisë të këtij institucioni.
Shërbimet e Policisë kanë kapur dhe vënë në pranga autorin e dyshuar, shtetasin 37 vjeç, banues në fshatin Rrapëz, për veprën penale “Ngacmimi seksual”.
Policia e Shtetit është e vendosur për të zbatuar me rigorozitet masat e përcaktuara në Paketën për Sigurinë në shkolla, duke bashkëpunuar ngushtësisht me oficerët e sigurisë në shkolla, stafet pedagogjike, psikologët, punonjësit socialë dhe me qeveritë e nxënësve.
