Një mjet i pashpërthyer është gjetur sot në çatinë e shkollës fillore “Shaban Shala” në Podujevë
Drejtori i Arsimit në Komunën e Podujevës, Avni Fetahu, ka thënë për Llapi.info se mjeti i dyshimtë është larguar, por që dyshohet se ka edhe të tjerë.
“Një mjet i pashpërthyer është gjetur dhe nga pasditja janë duke u marr tani organet përgjegjëse. Mësimi nuk zhvillohet derisa të sigurohet çdo gjë. Mjeti është larguar, por dyshohet se ka edhe tjera”, është shprehur Fetahu për Llapi.info.
Edhe shkolla “Shaban Shala” në qytet ka njoftuar se procesi mësimor nuk do të mbahet të enjten.
“Të dashur nxënës, mësimdhënës dhe prindër të respektuar! Ju informoi se me datë 05.05.2022 ( e enjte ) nuk do të mbahet mësim në shkollën tonë. Arsyetim: Punëtorët që janë duke punuar në renovimin e çatisë së shkollës kanë identifikuar disa mjete të dyshimta (dyshohet se janë lëndë shpërthyese), andaj deri sa organet kompetente ta bëjnë verifikimin e objektit të shkollës nuk do të paraqitemi në shkollë. Për çdo informatë shtesë do të ju informojmë me kohë”, thuhet në njoftim.
