Drejtoresha e Arsimit në Prishtinë, Jehona Lushaku-Sadriu ka vizituar shkollën “Dardania” në Prishtinë ku është pritur nga drejtori Besim Gashi.
Ndërsa renovimet në këtë shkollë po vazhdojnë, e para e arsimit në kryeqytet ka thënë se gjysma e objektit do të përfundojë në maj dhe gjithë objekti do të jetë gati për shtator 2024, shkruan AlbanianEducation.net.
Postimi i saj:
Në shkollën Dardania
Sot kam vizituar klasat e shkollës Dardania dhe kam parë nga afër kushtet e vështira në disa klasë ku mbahet mësimi.
Kam angazhuar ekip të veçantë për të ndërhyrë dhe sanuar defektet në këto klasa menjëherë gjatë vikendit.
Për njoftimin e të gjithëve, shkolla Dardania është në renovim me donacion nga Zyra e BE-së dhe kjo e ka detyruar shkollën që të mbajë mësim në tri ndërrime.
Kemi marrë zotim që gjysma e objektit do të përfundojë në maj dhe gjithë objekti do të jetë gati për shtator 2024.
Kërkoj mirëkuptimin e të gjithë prindërve dhe durim deri në përfundim të vitit shkollor. Shtatori do të jetë ndryshe.
Kryeqyteti është duke planifikuar fillimin e mësimit të vitit të ardhshëm në të cilin nuk do të ketë shkolla me tri ndërrime si dhe do të ketë riorganizim me qëllim të avansimit të cilësisë në arsim.
