Drejtoresha e IAAP “Ymer Prizreni” në Prizren, MSc. Myvedete Gavazaj, u ka bërë thirrje nxënësve dhe prindërve që të zgjedhin arsimin profesional, duke njoftuar se institucioni ka përfunduar të gjitha përgatitjet për pranimin e gjeneratës së re.
Sipas saj, shkolla është e gatshme t’i mirëpresë nxënësit në një mjedis modern, të sigurt dhe profesional, ku arsimi ndërthuret me aftësimin praktik dhe inovacionin.
Ajo ka bërë të ditur se aktualisht institucioni është në pritje të publikimit të konkursit për regjistrimin e nxënësve, ndërsa menjëherë pas shpalljes zyrtare do të publikohen procedurat, afatet dhe dokumentacioni i nevojshëm për aplikim.
Në thirrjen e saj, Gavazaj thekson se IAAP “Ymer Prizreni” ofron drejtime profesionale të kërkuara në tregun e punës, staf të kualifikuar, kabinete moderne, laboratorë e punëtori të pajisura, si dhe mundësi për mësim praktik në bashkëpunim me bizneset.
“Zgjidhni profesionin që ndërton të ardhmen tuaj. Zgjidhni cilësinë, dijen dhe aftësimin profesional. Zgjidhni IAAP ‘Ymer Prizreni’ – Prizren”, thuhet në mesazhin e drejtoreshës, e cila u ka uruar nxënësve suksese në rrugëtimin e tyre drejt një karriere të sigurt dhe një të ardhmeje të ndritur.
