Punësimi i mësimdhënësit të lëndës së edukatës fizike në Shkollën “7 Marsi” në Suharekë ka shfaqur në publik pakënaqësitë e kandidatëve për këtë pozitë për shkak se vendi i punës është “trashëguar” nga babai tek i biri.
Kandidati më i poentuar është zgjedhur Flakon Berisha, djali i Beqir Berishës, i cili ka punuar në të njëjtën shkollë deri në pensionimin e tij në prill të vitit 2023.
Jeton Zogaj, mësimdhënës i lëndës së edukatës fizike ka aplikuar në të njëjtin konkurs dhe thotë se ky konkurs ka pasur parregullsi.
Konkursi ishte hapur në janar të vitit 2023, herën e parë Zogaj ishte ankuar për procedurat e konkursit në komisionin e ankesave, i cili kishte rekomanduar Drejtorisë Komunale të Arsimit (DKA) që konkursi të kthehet në rivendosje dhe të ndryshohet komsioni vlerësues.
DKA-ja ka formuar komisionin e ri vlerësues dhe kandidatët janë intervistuar dhe përsëri kandidati më i poentuar del të jetë Flakon Berisha.
Mësimdhënësi Zogaj ka hedhur dyshimet se në komisionin vlerësues njëra nga anëtaret është familjare me kandidatin më të poentuar.
“Kandidati i cili po del fitues ka lidhje familjare me njërën nga anëtaret e komisionit, e cila ka bërë shkelje procedurale dhe ligjore, duke marrë për bazë ligjin për konflikt interesi në ushtrimin e funksionit publik dhe ligjin për diskriminim dhe ajo vazhdon që t’i ndihmoj këtij kandidati që të fitoj, ky kandidat është djali i ish mësimdhënësit që është pensionu nga kjo shkollë, do të thotë prindi është pensionu nga kjo shkollë, pikërisht në vendin e njëjtë dhe djalin e tij dëshiron ta punësojë pikërisht në të njëjtin vend”- ka shtuar Zogaj.
Ndërsa, Remzi Bajselamni, drejtor i Arsimit ka thënë se përzgjedhja e kandidatit nuk është bërë me ndikim dhe komisioni ka zgjedhur kandidatin më të suksesshëm.
“Edhe unë tani e kam kuptu. Ky tregoi që sinqerisht nuk e kam dit që kanë lidhje, tani pastaj e kam kuptu që ka pas një miqësi me njërën nga anëtaret e komisionit, por nuk interferon asgjë me ligjin kjo afërsi e largët që po e quajnë familjare”- ka thënë Bajselamni.
Beqir Berisha, mësimdhënësi që është pensionuar në mandatin e kaluar ka qenë drejtor i Kulturës në Komunën e Suharekës, ndërsa në zgjedhjet komunale në vitin 2021 ka kandiduar për asamble komunale nga radhët e partisë Aleanca për Ardhmërinë e Kosovës (AAK), parti e cila është në pushtet në Komunën e Suharekës.
KALLXO.com ka biseduar edhe me ish drejtorin e Kulturës për punësimin e djalit të tij në të njëjtin vend të punës që ka mbajtur ai.
“Unë ma merr menja që në qet Kosovën që jam duke jetu, fëmijët i kam krejt të shkollum, krejt me Master edhe djali jem është me Master dhe ka të drejtë me apliku, nuk i mohohet kërkujt e drejta për me konkuru”- ka thënë Berisha.
Tutje, ai ka thënë se nuk ka ndikuar për punësimin e djalit të tij “Kandidatët që janë anku i kam pas nxënës dhe kujdestar klase dhe as që kam tentu, le ta kryej komisioni ashtu qysh është konkursi, le të merr kush është më i miri”.
KALLXO.com ka provuar të kontaktoj edhe me mësimdhënësit Flakon Berisha, por deri në momentin e publikimit nuk ka marrë përgjigje.
Ndërsa, babai i tij e ka konsideruar shqetësuese: “Pom duket shqetësim nëse do me bisedu me dikë që konkurron”.
Flakon Berisha nga fillimi i kësaj jave ka filluar punën në Shkollën “7 Marsi”. / KALLXO.com
