Për më shumë se një vit shkolla fillore “Eqrem Çabej” në Mitrovicë është me ushtrues detyre të drejtorit pasi konkursi për zgjedhjen e tij ka dështuar këtë muaj për të tretën herë radhazi.
Njëjtë si kjo shkollë janë edhe dymbëdhjetë institucione të tjera arsimore që kanë mbetur pa drejtorë e zëvendësdrejtorë.
Konkursi për zgjedhjen e tyre dështoi si rezultat i interesimit të ulët për të aplikuar.
Sipas Udhëzimit administrativ për rekrutimin e drejtorëve, në rast se ka më pak se tre kandidatë konkursi duhet të rishpallet.
Opozita ka akuzuar pushtetin duke thënë se qytetarët kanë hezituar të aplikojnë për shkak të mosbesimit në qeverinë lokale.
“Është koha e shpagimit të borxheve të fushatës elektorale të vitit të kaluar, ashtu edhe ka dalë një përzgjedhje e tyre, është si rezultat i kthimit të borxheve, ndërsa ka rezultuar edhe mosinteresim i mjaftueshëm të kandidatëve për të aplikuar për pozitën e drejtorëve, sepse ka qenë e ditur se një pjesë e këtyre pozitave veç u janë premtuar disa individëve, shumica e kandidatëve potencialë e kanë parë si humbje kohe aplikimin për këto pozicione”, ka thënë asamblist i LVV-së në Mitrovicë, Faruk Mujka.
Ai ka theksuar se do të ndërmarrin veprime juridike ndaj Drejtorisë së Arsimit.
“Ne nuk mund të bëjmë veprim pa përfunduar procesi, mirëpo gjithsesi me të përfunduar procesi, atëherë do t’i ndërmarrim hapat ligjorë dhe këto vendime do t’i dërgojmë në Ministri të Pushtetit Lokal”, është shprehur Mujka.
Për dështimin e konkurseve dhe akuzat e opozitës në Komunën e Mitrovicës nuk dhanë asnjë sqarim.
E, në mbrëmje drejtoresha e Arsimit, Drita Kadriu, përmes një mesazhi në telefon ka thënë se nuk e sheh të arsyeshme të deklarohet për konkurset pasi procesi nuk ka përfunduar
Përderisa për trembëdhjetë shkolla dështoi konkursi për shkak të aplikimit të ulët, për pesë institucione të tjera arsimore pati interesim. Katër shkolla fillore dhe një e mesme e lartë pritet që këtë vit të bëhen me drejtorë të rinj. /KOHA/
