Familja e përsosur ekziston, është ajo që mbron, kujdeset, kupton dhe pranon anëtarët e saj ashtu siç janë. Të rritesh me këtë lloj ushqimi forcon identitetin e individit, duke i dhënë atij sigurinë dhe aftësinë për të pasur jetën që ai dëshiron në liri totale.
Dashuria në familje është baza e gjithçkaje. Të rritesh, të marrësh edukim dhe të jeni pjesë e një konteksti pozitiv parësor, të pasur me afeksion, vlera dhe siguri, luan një rol themelor në shëndetin psikologjik të secilit individ. Një pjesë e asaj që jemi sot shpesh është pasojë e përvojave dhe e lidhjeve me prindërit. Sipas Salvador Minuchin, psikiatër argjentinas i terapisë strukturore familjare, në çdo kulturë familja gdhend tek anëtarët e saj identitetin e tyre. Kjo ndodh në dy mënyra të kundërta: nga njëra anë, përmes ndjenjës së përkatësisë; nga ana tjetër, përmes dëshirës për të na ndarë nga ajo.
Edhe pse mund të duket kontradiktore, e gjithë kjo ka kuptim dhe na jep një mësim të vlefshëm. Të gjithë kemi një trashëgimi familjare, me origjinë nga ajo bërthamë e vogël shoqërore në të cilën thellohen rrënjët tona. Në të njëjtën kohë, pavarësisht se sa shumë i duam fëmijët tanë, qëllimi i tyre është të largohen nga prindërit. Krijimi i një jete personale ose ndërtimi i një familjeje apo bashkimi të ri është i dëshirueshëm dhe i nevojshëm. Në fund të fundit, ajo përcakton zhvillimin tonë si qenie njerëzore.
Afeksioni dhe dashuria në familje janë shtylla kurrizore e të gjitha marrëdhënieve. Por, në mënyrë që një familje të jetë e shëndetshme dhe funksionale, është e nevojshme të dini se si të doni. Le ta hedhim një vështrim më të afërt me këtë. Roli i familjes në shoqëri, në fusha të tilla si ndihmesa, arsimi dhe kujdesi për fëmijët, është i pamohueshëm. Është themeli i zhvillimit njerëzor dhe është gjithashtu baza e transformimit shoqëror. Pra, nuk po i referohemi vetëm një bërthame parësore për t’u siguruar sa i përket ndihmës dhe burimeve financiare. Një aspekt tjetër që nuk duhet anashkaluar është, pa dyshim, ai psikologjik.
Familje të ndryshme, të drejta të njëjta
Dashuria në familje duhet të jetë gjithmonë e pranishme, pavarësisht nga lloji i familjar. Ka shumë beqarë që zgjedhin të jetojnë aventurën e të qenit prindër të vetëm. Ka familje të zgjeruara që jetojnë nën të njëjtën çati: fëmijë, prindër dhe gjyshër që përballen së bashku me vështirësi, duke marrë pjesë së bashku në edukimin e fëmijëve.
Formimi i këtyre bërthamave sociale favorizon transmetimin e vlerave, afeksionit, zhvillimin fizik, emocional dhe psikologjik të fëmijëve, si dhe të gjithë elementëve që përcaktojnë çdo sistem familjar të shëndetshëm dhe funksional duke përfshirë:
Komunikim i mirë.
Vendosni rregulla të qarta për të promovuar mësimin e rregullave dhe të drejtave.
Krijoni një ambient në të cilin të shprehni emocionet dhe të mësoni t’i menaxhoni ato.
Shprehni afeksion, veçanërisht duke evituar shfaqjen e traumave të prindërve ndaj fëmijëve të tyre.
Edukoni për zgjidhjen e konflikteve, këmbënguljes dhe marrëdhëniet e shëndetshme shoqërore.
Dashuria në familje duhet të jetë e shëndetshme dhe duhet të sigurojë mbështetjen e nevojshme për secilin anëtar për t’u rritur dhe për të bërë zgjedhjet e tyre në respekt të plotë. Siç të gjithë e dimë, ka edhe dashuri që pengojnë zhvillimin optimal psikologjik dhe emocional të fëmijës. Ky është rasti i super mbrojtjes, ose i asaj dashurie të tepruar që përfundon në mbizotërim dhe kufizim.
Çdo bërthamë familjare duhet të kuptojë se, përveç aspektit ekonomik dhe burimeve pak a shumë të disponueshme, është mbi të gjitha aspekti emocional. Nuk ka rëndësi se cilën shkollë prestigjioze fëmija ndjek, sa lodra ose rroba ka nëse mungojnë aspektet e mëposhtme:
Mirëkuptimi: Të kuptuarit e këndvështrimit të secilit anëtar të familjes është thelbësore. Të dish të vendosësh veten në këpucët e tjetrit është thelbësore për ndërtimin e lidhjeve të forta dhe të shëndetshme.
Pranimi: Ky dimension është gjithashtu një ushqim thelbësor. Të jesh i dashur për atë që je, për zgjedhjet që bën, është ajo që duhet më shumë nga prindërit.
Mbrojtja dhe kujdesi: Është një koncept i qartë për të gjithë: të duash do të thotë të kujdesesh për tjetrin. Pak gjëra të ngushëllojnë si të ndjehesh i mbrojtur dhe i konsideruar nga të dashurit dhe në të njëjtën kohë të jesh në gjendje të ndryshosh.
Për ta përfunduar, asgjë nuk është më e rëndësishme se dashuria në familje, ajo që të rrethon, por që gjithashtu di të të lërë të shkosh. Të jesh i qartë se ku shtrihen rrënjët tona, por akoma, të qenit i lirë të kemi jetën që dëshirojmë, është një aspekt thelbësor i mirëqenies psikologjike dhe lumturisë.
Përgatiti: Orjona TRESA / Botuar në Revistën “Psikologjia”, Nr. 159
/Revista Psikologji
