Në kuadër të përkushtimit të saj për të mbështetur arsimin dhe zhvillimin kulturor të të rinjve, kineamja Cineplexx këtë javë organizoi një aktivitet edukativo-kulturor në shkollën fillore “Meto Bajraktari” në Prishtinë.
Ky aktivitet kishte për qëllim nxitjen e interesit të nxënësve për artin filmik dhe kinematografinë, si dhe promovimin e vlerave edukative përmes filmit.
Gjatë vizitës, përfaqësues të Cineplexx prezantuan për nxënësit rëndësinë e filmit si formë arti dhe mjet edukimi.
Nxënësit patën rastin të diskutojnë për përvojat e tyre me filmin, të mësojnë për procesin e krijimit të një filmi dhe të angazhohen në një bashkëbisedim të hapur mbi ndikimin pozitiv të kinemasë në jetën e përditshme.
Si shpërblim për pjesëmarrjen aktive dhe interesimin e treguar, Cineplexx dhuroi bileta falas për disa nga nxënësit pjesëmarrës, duke iu ofruar mundësinë që të vizitojnë kinemanë dhe të shijojnë një film të përzgjedhur.
Drejtoresha e shkollës, Kreshnike Kabashi, falënderoi kinemanë Cineplexx për iniciativën, duke theksuar rëndësinë që kanë këto bashkëpunime në pasurimin e përvojës arsimore të nxënësve.
Ky aktivitet është pjesë e përpjekjeve të vazhdueshme të Cineplexx për të qenë më afër komunitetit dhe për të mbështetur edukimin dhe kulturën tek brezat e rinj. /AlbanianEducation.net./.
