Çerdhja “Agimi” në Kaçanik ka mbyllur dyert për 150 fëmijë, pas nisjes së punimeve për rregullimin e një muri mbrojtës, që ndodhej afër shembjes. Prindër të fëmijëve u shprehën të shqetësuar për sigurinë, ndërsa drejtoresha e çerdhes dhe autoritetet komunale insistuan se fëmijët nuk i janë ekspozuar rrezikut
Në qendër të Kaçanikut, çerdhja “Agimi” ka mbyllur dyert që nga 1 prilli për 150 fëmijë, me të nisur punimet për rregullimin e murit afër saj që rrezikon të shembet.
Pavarësisht se rreziku është vërejtur para tre muajsh, çerdhja vazhdoi të funksionojë deri në fillimin e punimeve.
Prindërit u shprehen të shqetësuar për sigurinë e fëmijëve të tyre.
“Derisa ka qenë çerdhja hapur, e kam dërguar vajzën. Ajo ka shkuar rregullisht. Në momentin që ata na kanë njoftuar që për shkak të renovimit nuk punojnë, ne nuk mundemi që t’i dërgojmë fëmijët aty. Nuk kemi pasur informacion të mjaftueshëm, nuk e kemi ditur që është rreziku në atë nivel. Është pak shqetësuese e sidomos kur vjen puna te siguria, është shqetësuese”, ka thënë Kastriot Shehu, prind.
Kërkesa për ta evituar rrezikun është bërë nga drejtoria e çerdhes.
“Ka dy-tre muaj që është vërejtur që ka filluar shembja e dheut dhe janë marrë masat nga drejtoria komunale për ta sanuar këtë problem. Objekti nuk është i rrezikuar, nuk jemi nxjerrë të rrezikuar nga shembja e dheut, por për masa sigurie Drejtoria e Arsimit na ka urdhëruar që ta ndërpresim punën”, ka deklaruar Giltene Raka, drejtoreshë e çerdhes “Agimi”.
Megjithëkëtë, drejtori i Arsimit në Komunën e Kaçanikut, Zahir Doda, thotë se nuk ka pasur rrezik për fëmijët.
“Çerdhja është e ndërtuar mbi ‘pilot’, kështu e quajnë inxhinierët dhe, nëse i gjithë dheu të hiqet, çerdhja nuk besoj që lëviz sepse nuk ka të bëjë me kopshtin absolut. Muri mbrojtës që ka ekzistuar para kopshtit është krisur dhe ka filluar të lëvizë. Kështu që nuk ka rrezik të madh”, është shprehur Hoda.
Ai ka thënë se mbyllja e çerdhes përkohësisht është bërë që të mos rrezikohen fëmijët nga punimet.
“Para dy javësh kam kërkuar nga Drejtoria e Urbanizmit ku ka formuar një komision për të vlerësuar gjendjen. Komisioni prej ekspertësh ka vlerësuar që mund të jetë rrezik ai mur edhe menjëherë me procedura të shpejta kam kërkuar prej kryetarit të komunës që të intervenojë që të sanohet ajo gjendje”, ka bërë të ditur Hoda.
Ndërtimi i objektit të çerdhes sipër këtij muri është bërë para 5 vjetësh.
/ Marrë në KOHA.net
