Bashkimi i Sindikatave të Pavarura të Kosovës (BSPK) dhe Sindikata e Bashkuar e Arsimit, Shkencës dhe Kulturës (SBASHK), nëpërmes një reagimi, thonë se edhe pas shumë përpjekjesh e takimesh me përfaqësuesit e Qeverisë nuk është arritur kurrfarë marrëveshje dhe greva vazhdon.
“Të nderuara kolege, të nderuar kolegë, punëtorë të arsimit që nga çerdhet ,Arsimi Parauniversitar dhe ju në fakultete. Grevsitë të nderuar nga Federata e shërbyesve civil. Duke parë se kanë filluar qarqe të caktuara të plasojnë komente e lajme jo të vërteta ju informojmë nga Këshilli Grevist i BSPK -së e në bashkëpunim me Këshillin Grevist të SBASHK -ut se janë mbajtur sot dy takime dhe atë njëri në MASHTI dhe tjetri i Këshillit Ekonomik Social në ambientet e Qeverisë së Kosovës”, thuhet në reagimin e BSPK dhe SBASHK-u.
Sipas përfaqësuesve të sindikatave, ata ishin në nivel dhe u angazhuan për zgjidhje të kërkesave me dialog, por përfaqësuesit e Qeverisë nuk kanë bërë asnjë veprim pozitiv.
“Pra, takimet kanë zgjatur me orë, por pa as një rezultat kështu që greva vazhdon”, thuhet në reagimin e Këshillit Grevist të BSPK dhe Këshilli Grevist i SBASHK-ut.
