Shkencëtari nga Deçani, Naim Krasniqi me punë dhe banim në Francë, ka botuar librin shkencor “Mikrobota, më ndryshe: një strukturë shumë më ndryshe e atomit”.
Sipas redaktorit të librit, Hajdin Abazi, me këtë libër Krasniqi ka sjellë një vizion të ri shkencor në fizikë.
“Të marrësh në duar një libër si ky është një rast tepër i rrallë, thuaja si përjashtim. Sepse ke një narracion krejt ndryshe shkencor, që nuk haset askund tjetër. Vrushkujt e njëpasnjëshëm të ideve shfaqen sikur të ishte fjala për një magji. Janë ide krejt të reja, të padëgjuara më parë nga asnjë shkencëtar. Te këto ide që, në fakt, janë fenomene në mikrobotën e cila shpërfaqet me tjetër pamje metafizika, gjithsesi të panjohur. Kjo është forca që e bën pikëpamjen shkencore të Naim Krasniqit të jetë, thënë më së buti, provokuese, sepse hap një perspektivë dhe horizont tërësisht të ri”, ka shkruar Abazi për librin “Mikrobota, më ndryshe: një strukturë shumë më ndryshe e atomit”.
Librin e ka botuar shtëpia botuese Armagedoni dhe nga e hëna mund ta gjeni nëpër libraritë e Prishtinës, kurse nga fundi i javës tjetër, edhe në libraritë e qyteteve të Kosovës dhe në Shqipëri e Maqedoni të Veriut.
