Biologia gjenetike, Merita Vita Xhetani thotë se njeriu mund të jetonte 1000 vjet, nëse kjo do të varej vetëm nga gjenetika.
Në emisionin “Good Morning Albanians” në Euronews Albania, Xhetani nënvizoi se kjo i korrespondon jetës së një qelize në qelq ose in vitro.
“Fjala 1000, nuk i korrespondon jetës reale; i korrespondon jetës së një qelize në qelq ose in vitro, asaj e cila mund të shfrytëzojë kapacitetin maksimal të kromozomeve dhe gjeneve të saj, në dispocizion të mirëmbajtjes së vetes dhe qelizave përreth. Por organizmi është shumë më kompleks se kaq. Mekanizmi i njeriut është i varur nga mënyra se si ai ndikohet nga stimujt e jashtëm”, theksoi ajo.
Një grup shkencëtarësh kinezë kanë prodhuar një ilaç që simulon efektet e agjërimit në qeliza, duke aktivizuar një enzimë që rregullon konsumin e energjisë dhe redukton akumulimin e yndyrës.
Përbërja kimike e cila zgjati në mënyrë të shëndetshme jetëgjatësinë te minjtë dhe krimbat, mund të përdoret gjithashtu te njerëzit si një terapi për trajtimin e çrregullimeve metabolike si diabeti dhe mëlçia e dhjamosur. Rezultatet e studimit u publikuan në “Nature Metabolism”.
Ilaçi i quajtur “aldometanib” ka zgjatur jetëgjatësinë e krimbave nga 18 në 26 ditë dhe të minjve me të paktën 7.5%. Brejtësit treguan gjithashtu nivele të ulëta të glukozës në gjak dhe përmirësim të mëlçisë së dhjamosur.
