Në muajin e leximit, biblioteka “Shefqet Musaraj” e Vlorës vjen me të dhëna të kënaqshme sa i takon frekuentimit dhe kërkesës së qytetarëve për librat.
Janë të paktën 6500 libra në muaj që tërhiqen apo kërkohen të lexohen nga fondi i kësaj biblioteke, duke e renditur të dytën në vend pas bibliotekës kombëtare sa i takon frekuentimit nga qytetarët.
Në fakt qytetarët e Vlorës mes disa cilësive që kanë, adhurimin ndaj librit e kanë një prej tyre. Po cilët janë më besnikët ndaj librit dhe bibliotekës në Vlorë.
“Fasha reale është brezi i mesëm, që nuk e braktis kurrë bibliotekën, dhe pranoj që zonjat janë frekuentuese të mëdha të bibliotekës”, thotë drejtoresha e bibliotekës, Elma Rama.
Ndonëse numri i klientëve të kësaj biblioteke është i konsiderueshëm, nevoja për të tërhequr brezin e ri për një edukim më të mirë me librin fizik, mbetet, një nga prioritet kryesore të edukimit të brezit të ri. Për këtë qëllim, drejtuesja e bibliotekës së Vlorës propozon nisma konkrete për të afruar më shumë rininë me librin. “Në kurrikulat e shkollave 9- vjeçare por edhe parashkollore, të futet si orë ardhja në bibliotekë. Atëherë fëmija do të edukohet dhe do t’i kërkojë prindërve t’i çojë aty”, thotë ajo.
Aktualisht biblioteka e Vlorës ka mbi 50 mijë tituj librash, shifër kjo më e vogël nga numri total që ka patur para viti 97 dhe dy përmbytjeve që dëmtuan dhe bënë të papërdorshëm mijëra tituj të tjerë.
E ndërsa pasurimi me tituj të rinj vijon të behët, për lexuesin vlonjat dhe fluksin e kërkesave në bibliotekë ka lindur nevoja e një godinë më dinjitoze si për lexuesit ashtu edhe për kushtet e ruajtjes së librave. /A2news
