Nënkryetarja e Partisë Demokratike të Kosovës, Besianë Musmurati, ish-drejtoreshë e Arsimit në Prishtinë ka kritikuar Qeverinë Kurti për shkak se po i lë sërish nxënësit pa libra në fillim të vitit shkollor, shkruan AlbanianEducation.net.
Deklarata e saj e plotë:
Edhe ky shtator po e gjen Qeverinë e Kosovës dhe Ministren Nagavci të papërgatitur
Ministrja Nagavci ka vendosë me vazhdu eksperimentimin e saj të pakuptimtë, për mos sigurimin e librave shkollore ne kohë. Në vend se të bëjmë hapa para me reformë strukturore në arsim, Ministrja Nagavci po na kthen mbrapa me vendime të gabuara.
Pra, edhe njëherë nxënësit e klasëve 1 deri në klasën e 9-të do të fillojnë vitin pa libra.
Lajmi i vetëm i mirë në krejt këtë mes, e që na jep shpresë për të ardhmen, është që veçse jemi në prag të zgjedhjeve të reja.
Arberie Nagavci nuk duhet të jetë më Ministre e Arsimit nga viti tjetër.
Qytetarët tanë do të mund të përjetojnë dallimin e mendesisë në qeverisje me ardhjen e Bedri Hamzës dhe ekipit të tij në krye të shtetit.
Digjitalizimin e proceseve në arsim do ta vendosim në shërbim të nxënësve, e mos ta bëjme tabelë qitjeje për dështimet administrative e politike.
Me digjitalizimin e kurrikulës me përmbajtje krejtsisht të re, furnizimi me libra nuk do të jetë më temë e 1 shtatorit.
