Një grua 35-vjeçare ka qenë e ftuar në emisionin “Historia ime” në Tv Klan ku ka rrëfyer historinë e jetës së saj dhe vështirësitë që ka kaluar për 15 vite me një bashkëshort të dhunshëm dhe që shkaktonte sherre gjithmonë në shtëpi.
Ajo ka treguar se erdhi një moment që nuk mund të duronte më dhe vendosi të ndahej. Pas ndarjes ish-bashkëshorti i saj nuk paguan pensionin për 4 fëmijët dhe mbi të gjitha ai është zhdukur dhe nuk ka kontakt me familjen.
Gruaja nuk e di se ku ndodhet ai apo se çfarë bën, por ka dëgjuar nga të tjerët se është në Mal të Zi dhe është martuar me dikë tjetër.
35-vjeçarja:Ish-bashkëshorti nuk u paraqit në gjykatë për divorcin, kishte sjellë avokatin e tij nga Durrësi sepse ai ishte jashtë shtetit.
Mirela Milori: Gjykata të dha ty kujdestarinë e 4 fëmijëve, po ai çfarë detyrimesh kishte?
35-vjeçarja: Ai duhet të jepte 360 mijë lekë për 4 fëmijët dhe nuk i ka dhënë kurrë. Ai nuk ka ardhur t’i shikojë me sy, jo më të paguante.
Mirela Milori: 2 vite nuk ka ardhur t’i takojë fëmijët?
35-vjeçarja: Jo nuk bëhet fjalë. Nuk ia kam idenë se ku mund të rrijë, kam 7-8 muaj që nuk e di sepse dikur rrinte punonte në Mal të Zi, po tani thanë që është martuar dhe nuk e di. Tani nuk kam asnjë kontakt me të. Që kur jam ndarë me të, nuk kam kontakt me asnjë nga familja e tij, nuk duan t’ja dijnë fare. Avokati më ka thënë që nuk kemi se çfarë i marrim se ai nuk ka një punë me siguracione, nuk ka një shtëpi, nuk ka makinë, çfarë t’i marrim? Po dhe unë me një rrogë fabrike nuk kam si i mbaj dot 4 fëmijë. Punoj tek një fabrikë këpucës dhe marr 200-250 mijë lekë të vjetra. Jetoj me qira në një shtëpi me lagështirë. 100 mijë lekë e kam qiranë, dritat e ujë mund të shkojnë deri në 50 mijë lekë dhe e kam të vështirë t’ja dal.
