Gjykata Kushtetuese ka marrë vendim të premten që t’i shfuqizojë disa nga nenet e Udhëzimit Administrativ për Kriteret dhe Procedurat e Themelimit dhe Pushimit të Veprimtarisë së Institucioneve të Arsimit Parauniversitar.
Ministria e Arsimit kishte marrë autoritetin për të vendosur lidhur me çështjen e mbylljes së shkollave në nivel lokal sipas këtij Udhëzimi Administrativ, raporton Gazeta Sinjali.
Pas kësaj, Ish-kryetari i Komunës së Kamenicës, Qëndron Kastrat, i ishte drejtuar Gjykatës Kushtetuese lidhur me Udhëzimin Administrativ.
Udhëzimi i Ministrisë për kompetencën për vendimmarrje të plotë nga pushteti qendror për formimin dhe shfuqizimin e institucioneve të nivelit parauniversitar nëpër komuna bie ndesh me kompetencat e pavarura të komunës, sipas Kushtetutës.
Për këtë çështje, Kastrati tha për Sinjalin se vendimi i Kushtetueses hyn në kuadër të qasjes të MASHTI-t i cili në mënyrë të vazhdueshme, sipas tij, ka tentuar dhe tenton të hyjë në kompetenca të nivelit lokal.
“Tashmë po bëhen dy vendime të Kushtetueses që duhet të ia bëjnë të qartë edhe MASHTI-t edhe qeverisë se duhet të respektohet ndarja e pushteve. Tash në këtë rast ne kemi komuniku disa herë edhe me ministren Nagavci i kemi shkruar edhe kryeministrit Kurti që ta korrigjojnë udhëzimin e tillë por ata nuk ishin të interesuar çka e bën më shqetësuses këtë që prej vendimit të gjykatës është kuptu që kryetari i tanishëm ka kërkuar që të tërhiqet Komuna e Kamenicës nga kjo kërkesë dhe që Kushtetuesja të mos e trajtojë si rast. Kjo, sikurse në rastin e kaluar ku e bën të qartë se kanë qenë të vetëdijshëm që një gjë e tillë është shkelje”, u shpreh ai.
Megjithatë, kjo nuk është beteja e parë mes MASHTI-t dhe Komunës së Kamenicës.
Në prill të këtij viti, Gjykata Kushtetuese e kishte hedhur poshtë vendimin e Ministrisë së Arsimit për organizimin e mësimit alternativ të përshpejtuar dhe përcaktimit të organizimit në objektet shkollore në Komunën e Kamenicës.
Në vendimin e Kushtetueses thuhet se MASHTI-i përmes vendimit ‘ka tejkaluar kompetencën dhe ka cenuar përgjegjësitë komunale, përkatësisht ka ndërhyrë në kompetencat vetanake të Komunës së Kamenicës përkitazi me ofrimin e arsimit publik, në kundërshtim me garancitë kushtetuese dhe ligjore’.
Atë kohë, Nagavci kishte konsideruar se “situata faktike e krijuar që nga fund-korriku 2021 dhe në vijim, është plotësisht në përputhje me përcaktimin e Aktgjykimit në fjalë, prandaj MAShTI-i nuk ka nevojë të ndërmarrë asnjë veprim në drejtim të tillë”.
E Kastrati duke ju referuar të dy vendimeve të Kushtetueses, thotë se është shqetësuese që ministrja e Arsimit “thotë se e ka shkel Kushtetutën për ta respektuar ligjin”.
“Në rastin e parë e ka shkelë Kushtetutën me veprim ndërsa në rastin e dytë e ka shkelë me mosveprim dhe është shqetësuese sesa jo njohëse e Kushtetutës dhe rregullativës ligjore dhe më shqetësuses është që është master në juridik. Paramendo kemi ministre që thotë se e ka shkel Kushtetutën për me respektu ligjin që është totalisht injorancë dhe nuk mundet me pas ligj që është në kundërshtim e as mbi Kushtetutën”, tha Kastrati për Sinjalin.
Ndryshe, ministrja Nagavci në shtator të këtij viti u bë kryefjalë në media për studimet master dhe kohëzgjatjen e këtyre studimeve në Fakultetin Juridik në Universitetin e Prishtinës.
Studimet në këtë nivel i kishte filluar në vitin 2009/2010 dhe ka arritur t’i përfundojë tek më 5 prill të vitit 2019. /Sinjali
