Gjatë nënshtrimit të Testit të Arritshmërisë, nxënësit kopjuan përgjigjet edhe për pyetjet më bazike, si për ato që kanë të bëjnë me shpalljen e pavarësisë.
Udhëzimi administrativ për vlerësimin e tyre parasheh që nxënësit të cilët nuk arrijnë rezultatet minimale mbesin në riprovim.
Ndërsa ata që mbesin në riprovim në më shumë se tri lëndë, ngelin.
Por për të arritur kriterin e kalueshmërisë për lëndë, nxënësi mjafton që gjatë vitit shkollor të marrë një dysh.
Drejtori i shkollës “Hilmi Rakovica”, Skender Halimi, thotë se nxënësit e shfrytëzojnë këtë hapësirë ligjore për të kaluar vitin shkollor.
“Udhëzimi administrative ju krijon këtë hapësirë nxënësve që njëherë arrin të marr një notë dy, notën mjaftueshme, e kalon vitin sepse mesatarja aritmetike e dy notave del 1.5 dhe sipas udhëzimit administrativë, 1.5 rrumbullakohet me 2 dhe matematikisht rrumbullakohet me dy, mirëpo çka me ju bë rasteve kur gjatë gjithë vitit nxënësit nuk arrin asnjëherë këtë minimum të rezultateve që i kërkon program lëndor në lëndë të ndryshme që punojnë mësimdhënësit”, ka deklaruar Halimi.
25 nxënës kanë mbetur në riprovim në shkollën “Hilmi Rakovica” në kryeqytet, e nëntë kanë ngelur vitin. E në shkollën “Asim Vokshi” nuk ka ngelur asnjë nxënës.
“Asnjë nxënës nuk ka mbetur në riprovim për arsye se mësimdhënësit e kanë pasur obligative ta mbajnë mësimin plotësues për të gjithë fëmijët që kanë pasur ngecje për t’i arritur rezultatet të cilat i ka caktuar mësimdhënësit… Gjithmonë legjislacioni në fuqi e sheh progresin e nxënësve dhe udhëzimi administrative e sheh progresin dhe në bazë të progresit të nxënësve vlerësohen nxënësit”, është shprehur Nazif Jashari, drejtor i Shkollës Fillore të Mesme të Ulët, “Asim Vokshi”.
Sipas njohësit të arsimit, Rinor Qehaja, vlerësimet e brendshme të nxënësve nuk paraqesin gjendjen faktike të mësimnxënies.
Sipas tij, mësimdhënësit vlerësojnë nxënësit me nota më të larta se që meritojnë.
“Vlerësimi diferencial është në rregull të jetë më i relaksuar në shkollën fillore, mirëpo jo edhe në nivelin e mesëm të ulët dhe të lartë, çfarëdo fryrje e rezultatit pa dyshim është në dëm për nxënësit dhe kjo është ai interesi kombëtar i cili është i domosdoshëm të rikthehet në vëmendje, në mënyrë që të mos krijojmë iluzione që të ballafaqohen nxënësit tanë më këto shkathtësi dhe dije të vërtetë që ata e kanë që të punojmë dhe t’i përmirësojmë më ta drejt korrigjimit”, ka thënë Qehaja.
Në vlerësimet ndërkombëtare ka rezultuar se 85 për qind e nxënësve në Kosovë nuk mund të zgjidhin një detyrë të thjeshtë matematikore dhe nuk mund ta kuptojnë një tekst me gjatësi mesatare. / KOHA.net
