Andi B. Shyti, nipi i dëshmorit Mustafë Shyti, dhe Luna Ramadani, mbesa e dëshmorit Agim Ramadani, të dy nxënës të shkollës “Andon Zako Çajupi” në Mitrovicë, kanë dhuruar me krenari libra kushtuar jetës dhe veprës heroike të gjyshërve të tyre – dëshmorëve të Kosovës, shkruan AlbanianEducation.net.
Këta libra, që tashmë janë pjesë e bibliotekës së shkollës, përbëjnë një dëshmi të gjallë të sakrificës për liri dhe mbajnë të gjallë kujtimin e atyre që dhanë jetën për atdheun.
Ato do t’u shërbejnë brezave të rinj si frymëzim dhe mësim për guximin, dashurinë për vendin dhe qëndresën kombëtare.
“Ndjehemi krenarë që në shkollën tonë mësojnë Andi dhe Luna – pasardhës të dëshmorëve që me gjakun e tyre shkruan historinë e lavdishme të popullit tonë”, ka njoftuar drejtoresha e shkollës, Meli Meha.
Ky gjest simbolik, por i madh në vlerë, është një kujtesë se trashëgimia e dëshmorëve vazhdon të jetojë përmes brezave të rinj që ruajnë me respekt historinë dhe identitetin tonë kombëtar.
