Amerikanët njihen për lirshmërinë e të folurit me fëmijën rreth temave delikate si alkooli, përdorimi i drogës, seksi apo tema të tjera të cilat në vendin tonë mund të shihen si tabu. Por fakt është që një numër i konsiderueshëm i prindërve amerikan nuk flasin me fëmijët për pasurinë apo trashëgiminë e tyre
Sipas një studimi të Menaxhimit të Pasurisë Private me 650 familje, dy të tretat e amerikanëve që kanë të paktën 3 milion dollarë pasuri të investueshme, nuk kanë biseduar me fëmijët e tyre në lidhje me pasurinë dhe nuk do ta bëjnë kurrë këtë.
Disa prej tyre në studim janë shprehur se ky diskutim nuk ka vlerë pasi fëmija i tyre e kishte kuptuar. Por 67% i kanë bërë dhurata ‘në heshtje’ fëmijëve të tyre, duke i lënë mënjanë para për të siguruar shkollën apo për të blerë shtëpi. 10% refuzonin me vendosmëri të flisnin me fëmijët e tyre rreth parasë.
Në shoqërinë tonë ky lloj kufizimi në komunikimin rreth pasurisë nuk praktikohet dhe as nuk është bërë ndonjë studim në lidhje me këtë. Ne shohim sot në mënyrë masive 15-vjeçarë të cilët lëvizin me makina luksoze dhe me veshje të firmave më të shtrenjta. Jo rrallë herë mund të shohim dhe fëmijët e vipave shqiptarë të veshur me Dolce Gabbana apo Gucci. Por nuk mund të arrijmë në konkluzionin se çfarë mënyre përdorin shqiptarët për të komunikuar me fëmijët e tyre rreth pasurisë.
Nga ky studim që është bërë për sjelljen e prindërve amerikan mund të kuptoni se cila është sjellja e duhur që duhet të praktikoni.
Nëse reflektojmë për pak në lidhje me kohën ku po jetojmë, lind pyetja si mund të ekzistojë kjo lloj mënyre komunikimi që amerikanët zbatojnë me fëmijën, në një kohë ku çdo përgjigje gjendet në internet. Këtu janë pse prindërit e shmangin këtë bisedë dhe çfarë duhet të bëjnë në lidhje me këtë.
Mendojnë se fëmija nuk i vëzhgon
Arsyeja më e zakonshme për të mos folur për pasurinë, e cituar nga prindërit, është se ata nuk duan që trashëgimia e tyre të ‘grabisë’ motivimet e fëmijës. Pra logjika e tyre qëndron në pjesën që nëse një prind nuk thotë asgjë, fëmija e tyre nuk do ta kuptojë kurrë pasurinë e familjes. Kjo është e pamundur!
Tani fëmijët janë në gjendje të përdorin teknologjinë në mënyrën më të mirë të mundshme dhe ata mund ta përcaktojnë lehtësisht se sa kushton makina, shtëpia apo pushimet e tyre.
Dennis Jaffe, një psikolog amerikan që punon në familjet e pasura, thotë për “New York Time” se një fëmijë në klasën e dytë është në gjendje të rendisë pasurinë e gjithë nxënësve në klasën e tij mjaft saktë, shkruan Class.
“Kjo gjë nuk mund të përcaktohet si pozitive apo negative, madje ata nuk e kanë ende ndjenjën e xhelozisë. Por këto janë momente mësimore për vlerat.”
