Kryetari i AAK-së, Ramush Haradinaj, tha se kryeministri Albin Kurti i ka urrjetë gjithmonë regjimet, andaj sipas tij tashmë kur vet është në regjim, nuk po ka armiq tjerë dhe ka filluar t’i urrej mësimdhënësit dhe sindikatat.
Haradinaj këto komente i bëri në fjalimin e tij parlamentar kushtuar gjendjes me grevën në arsim dhe sektorë tjerë në Kosovë.
Ky “gudby” ynë këtu është i keqtrajtuar, është i urrejtur dhe është rritur duke urrjet regjimet. I ka thënë regjimi i atij, regjimi i këtij. Prej që është bërë regjim u kthy dhe ka filluar t’i urrej ata që e kanë pru në regjim. Se si ka mbet më askush kënd me urrjet, i ka urrejt regjimet në shpirt, në palcë, armiqtë e brendshëm. Kush janë armiqtë e brendshëm? Sindikatat, mësuesit, ata duhet mi urejt, duhet m’i mujt, m’i nënshtru ky. Nuk je duke e nënshtrua PAN-in, je duke i nënshtrua mësuesit, ta tregojnë qefin kur të vjen vakti ata. I ka gjet edhe armiqtë në VV, ky s’ja voton atë, ai s’ja voton atë”, tha Haradinaj.
Ai e kritikoi edhe qeverinë se po e pengojnë në foltore e të cilët sipas Haradinajt nuk po dëgjohen nga publiku.
“Po pengohem nga qeveria. Nëse vazhdon kështu do t’ua kthej në atë mënyrë që e marrë”, tha Haradinaj.
Ndërkohë, Haradinajt iu kundërpërgjigj menjëherë kryeministri Kurti, duke i thënë se është e çuditshme që Haradinaj flet në emër të mësimdhënësve.
“Haradinaj me tha se mësuesit ta tregojnë qejfin kur ti vi vakti. Mu dok shumë e çuditshme që Haradinaj flet në emër të mësimdhënësve”, tha Kurti.
