Ka nisur një ‘luftë e re’, mes ministres së Arsimit Arbërie Nagavci dhe kryetarit të SBASHK-ut, Rrahman Jasharaj.
E gjitha nisi pasi Jasharaj parlajmëroi grevë të përgjithshme nëse Qeveria nuk refleton dhe nuk ulet për të biseduar me ta dhe t’ua plotësojë kërkesat.
“Ne do të fillojmë me grevë para se të fillojë viti shkollor, pra me 24 gusht, kur mësimdhënësit do të jenë në shkolla. Ata nuk do ta kryejnë asnjë detyrë që e kanë obligim. Grevën do ta fillojmë një javë para se të fillojë mësimi e me shpresë se kjo do të ndikojë te qeveria që të ulet dhe të bisedojë për kërkesat tona 100 euro shtesë në paga që të dimë për ligjin e pagave dhe të marrim pjesë aktive në përgatitjen e tij”, thotë kreu i SBASHK-ut, Rrahman Jasharaj.
Por Nagavci ju kundërpërgjigj duke thënë se nuk është koha për greva por për angazhim.
“Kërcënimi me grevë për 1 shtatorin, ditën e parë të mësimit për vitin 2022 – 2023 është i papranueshëm. Çfarë do të mbërrihet me çfarëdo greve është vetëm dëmtim i procesit të mësimit për fëmijët tanë. Rezultatet në arsim nuk janë ato që i dëshirojmë. Duhet shumë punë e përkushtim nga të gjithë, në mënyrë që të kemi ndryshime pozitive.
Ata që ja duan të mirën vendit, të ardhme më të mirë për fëmijët e suksese të përbashkëta duhet të ftojnë për angazhim dhe jo për greva, bllokada e pengesa. Si Qeveri e në Ministri të Arsimit, po punojmë me intensitet të shtuar në të gjitha drejtimet, në legjislacion, përmirësim të infrastrukturës shkollore, mbështetje për mësimdhënësit e nxënësit dhe nuk e kemi ndërmend të ndalemi. Edhe legjislacioni që i rregullon pagat dhe të tjera po bëhet dhe do të bëhet si më mirë të jetë e mundshme”, ka reaguar Nagavci.
Mbetet të shihet deri para datës 24 gusht kur SBASHK ka paralajmëruar nisjen e grevës kur mësimdhënësit nisin të paraqiten në shkolla, nëse do të ketë ndonjë takim mes përfaqësuesve të Ministrisë së Arsimit dhe SBASHK-ut për të ulur tensionet dhe nisur vitine ri shkollor apo jo.
Nëse kjo nuk ndodh nisja e grevës bëhet e pashmangshme.
Derisa MASHT dhe SBASHK të arrinë pajtimin, nxënësit dhe mësimdhënësit do t’i kenë vëmendjen tek lajmet që do të vijnë dhe vendimet që do të merren. /Albanian Kids Education/
