Gjendja në arsimin në Kosovë nga paslufta nuk është më e mira.
Është rregulluar infrastruktura shkollore, janë ndërtuar shkolla të shumta, salla sportive, kabinete të ndryshme, por shqetësuese mbetet punësimi i mësimdhënësve dhe drejtorëve të shkollave përmes lidhjeve politike.
Drejtorët e emëruar në baza partiake e më pas edhe një numër shumë i madh i mësimdhënësve pa meritë ka ndikuar jo pak që gjendja në arsim të jetë tejet e rënduar, dhe kështu rrjedhimisht nuk mund të pritet shkollim cilësorë.
Se shkollimi nuk është në nivelin e duhur e tregon edhe PISA, megjithatë për këtë fajin nuk e kanë veç mësimdhënësit por një pjesë edhe vet prindërit.
Duke parë të gjitha këto probleme, shtrohet pyetja sa meritojnë pagë mësimdhënësit?
Së fundmi me ligjin e ri kishin një rritje që nuk i kënaqi, çka jo pak reaguan, por që u pajtuan pasi nuk mund të protestonin pas grevës së shtatorit.
Duke marrë parasysh (mos) punën e shumicës së mësimdhënësve, orarin që e kanë, rezultatet, shtrohet pyetja se a meritojnë më shumë se një pagë 500 euro?
Megjithatë, pas një vlerësimi dhe largimit nga puna të gjithë atyre mësimdhënësve që nuk meritojnë ta ushtrojnë profesionin e shenjtë të mësuesit dhe kanë hyrë përmes lidhjeve politike, atëherë sigurisht se pagat e mësimdhënësve duhet të jenë shumë më të larta, pse jo të kapin edhe shifrën 1000 mijë euro.
Por, ditari t’iu besohet veç mësimdhënësve që vërtetë e meritojnë dhe në vazhdimësi tregojnë rezultate të larta.
Vetëm në këtë mënyrë mund të forcohet figura e mësimdhënësve. Të mbeten në arsim vetëm mësimdhënësit që e meritojnë dhe jo ata që e katandisën arsimin dhe u bënë pjesë e tij përmes lidhjeve politike duke shkatërruar edhe të ardhmen e fëmijëve.
Nga Flamur Hasani
