Është e paqartë nëse të hënën do të nis viti i ri shkollor apo greva do të vazhdojë.
Kjo pasi Ministria e Arsimit dhe Sindikata e Arsimit kanë bërë thirrje të ndryshme.
Përmes një komunikate, të dielën, ministria e drejtuar nga Arbërie Nagavci iu ka bërë thirrje mësimdhënëseve që të shkojnë në punë të hënën.
“Duke e marrë me seriozitet obligimin tonë për realizimin e plotë të së drejtës për arsim, por edhe përmirësimin e kushteve dhe kompensimin e mësimdhënësve, kërkojmë nga të gjitha palët e përfshira, që të rishikojnë dhe balancojnë interesat dhe t’i kthehen që nesër procesit mësimor”, thuhej në komunikatë.
Madje edhe nga Komuna e Podujevës, drejtori i arsimit, Avni Fetahu ka thënë se greva do të ndërpritet.
Ai referencë e ka marrë deklarimin e tri shkollave në Podujevë për ndërprerjen e grevës.
Një ashtu edhe komunat e tjera ku qeverisë Lëvizja Vetëvendosja, Gjilani, Kamenica dhe Shtimja, janë që nesër të nis mësimi.
Por kështu nuk po mendon, Rrahman Jasharaj, kryetar i Sindikatës.
Gjatë një interviste në lajmet e mbrëmjes së RTK-së, ai ka thënë se nesër vazhdon greva.
“I lus prindërit të mos i dërgojnë nesër fëmijët në shkollë”, ka thënë ai.
E për sa i përket thirrjeve të pushtetit që greva të ndërpritet, ai ka thënë se “mësimdhënësit nuk bien në presion”.
Greva ka nisur më 25 gusht dhe si kërkesë ka shtimin e 100 eurove në pagë për përballimin e inflacionit.
Ndërsa Ministria e Financave, Punës dhe Trasnfereve, ka kërkuar nga komunat listat e grevistëve. Ato s’janë ofruar nga shumica e komunave.
Rrjedhimisht pagat si tërësi në këtë sektor nuk janë ekzekutuar.
