Bedri Cahani, i cili është drejtor i gjimnazit “Hajdar Dushi” në Gjakovë, ka pak fuqi në duar për të ndihmuar profesorin Ilir Zeka, i cili ligjëron lëndën e Edukatës Fizike në këtë shkollë.
Këto mundësi i munguan edhe në të kaluarën, ku sipas Cahanit, në shkollën që ai udhëheq, kishte pasur shumë mësimdhënës që vuanin nga sëmundje të rënda, ndërsa tani kanë vetëm një, raporton Kiks Kosova.
Krejt çka ai dhe stafi i gjimnazit mund të bëjnë për profesorin e Edukatës Fizike është t’i dalin në ndihmë, sidomos atëherë kur i përkeqësohet gjendja shëndetësore.
Sipas drejtorit, derisa profesori Ilir ishte në pushim mjekësor, i vështirë ka qenë zëvendësimi i tij, si pasojë e procedurave burokratike.
E me probleme të ngjashme në komunën e Gjakovës vuajnë edhe dhjetëra mësimdhënës të tjerë, të cilët sëmundja i ka detyruar të shkojnë zvarrë në shkollë.
Nga Drejtoria e Arsimit në këtë komunë kanë bërë të ditur se përmes një Udhëzimi Administrativ, të cilin e kishte lëshuar Ministria e Arsimit në prill të vitit 2022, mësimdhënësve me sëmundje kronike u ishte mundësuar pushimi mjekësor me pagesë dhe zëvendësimi i tyre.
Mirëpo, i njëjti, sipas DKA-së, kishte përfunduar në fund të dhjetorit të vitit të kaluar.
Sipas drejtoreshës Eranda Komunova-Baçi, ministria i kishte thënë se nëse ky udhëzim do të vazhdojë edhe në vitin 2024, do ta lajmërojnë, e që deri tani ajo thotë se nuk ka marrë asnjë informatë nga MAShTI.
Për shkak të këtij vendimi, ajo thotë se mësimdhënësit janë detyruar të kthehen në atë gjendje në punë.
Ajo ka treguar se gati çdo ditë këta mësimdhënës trokasin në derën e drejtorisë për të kuptuar nëse për ta është bërë një zgjidhje, por që, sipas saj, nuk kanë asgjë në dorë për t’iu ndihmuar. /KlanKosova
