32 nxënës të Gjimnazit “Hivzi Sulejmani” në Fushë-Kosovë janë bërë pjesë e projektit “Promovimi i Vlerave Humane”, i cili organizohet në kuadër të Kryqi i Kuq i Kosovës.
Ky projekt synon fuqizimin e të rinjve përmes vullnetarizmit, solidaritetit dhe angazhimit aktiv në komunitet, duke i inkurajuar ata të jenë zë pozitiv dhe faktor ndryshimi në shoqëri.
Në kuadër të projektit, nxënësit kanë realizuar aktivitete konkrete në katër fusha të ndryshme, duke promovuar vlerat humane, bashkëjetesën dhe respektin e ndërsjellë, si dhe duke u angazhuar në iniciativa sensibilizuese dhe vullnetare në dobi të komunitetit. Përmes këtyre aktiviteteve ata kanë dëshmuar përkushtim, përgjegjësi dhe gatishmëri për të kontribuar në ndërtimin e një shoqërie më të drejtë e më solidare.
Pjesëmarrja e nxënësve me prapavijë të ndryshme etnike është dëshmi e fuqisë së bashkëpunimit dhe e rëndësisë së edukimit për paqe, tolerancë dhe mirëkuptim.
Gjimnazi “Hivzi Sulejmani” mbetet i përkushtuar në mbështetjen e iniciativave që zhvillojnë potencialin e të rinjve dhe kultivojnë vlera humane në shoqërinë tonë.
