Ministrja e Arsimit, Arbërie Nagavci, ka njoftuar se në konkursin për 20 vende të lira për inspektorë të arsimit kanë aplikuar 250 persona, popr që vetëm 39 prej tyre e kanë kaluar rishikimin addministrativ duke plotësuar kriterin për të vijuar në fazën tjetër, shkruan Albanian Education.
Njoftimi i saj i plotë:
Me kërkesë të Ministrisë së Arsimit, në bazë të legjislacionit në fuqi, Ministria e Punëve të Brendshme ka hapur konkursin për rekrutim të jashtëm të 20 inspektorëve të arsimit. Konkursi ka qenë i hapur nga data 23.11.2022 deri më 07.12.2022.
Nga Divizioni përkatës në MPB i cili e ka bërë rishikimin e aplikimeve, kemi pranuar njoftimin se nga 250 aplikantë vetëm 39 e kanë kaluar rishikimin administrativ duke plotësuar kështu kriterin për të vijuar në fazën e dytë të rekrutimit.
Të gjithë kandidatët që nuk e kanë kaluar rishikimin administrativ të aplikacioneve, janë njoftuar individualisht përmes emailit për arsyet e moskualifikimit për fazën tjetër të rekrutimit.
Afati i ankesave është deri më 10 janar, andaj inkurajoj të gjithë aplikantët që kanë shqetësime për këtë fazë të shqyrtimit administrativ të dokumentacionit, t’i paraqesin ankesat online ose në kopje fizike brenda afatit të ankesës.
