11 vjeçari nga fshati Kishnicë e komunës së Graqanicës, Festim Gashi, me nevoja të veçanta, të hënën nuk arriti të shkojë në shkollë në ditën e parë të gjysmëvjetorit të dytë.
Rruga përpjetëze që shpie në shkollën “Ditët e Minatorit” në të cilin ai vijon mësimin në klasë të gjashtë, pati borë dhe në të ai bashkë me të ëmën nuk pati mundësi të ngjitej.
Në këtë situatë, e ëma e tij Shqipe Gashi tha se u ndie keq që i biri me gjithë dëshirën e madhe nuk arriti të ishte prezent në klasë në ditën e parë të gjysmëvjetorit të dytë.
Drejtori për shërbime publike në komunën e Graqanicës, Vlladica Trajkovic tha se përvec rrugëve me prioritet të fshatit që i kanë pastruar e kanë llogaritur edhe rrugën që shpie për në shkollë, mirëpo sipas tij kamionët nuk kanë arritur të ngjiten e të kryejnë punën e tyre në këtë tatëpjetëze prandaj këtu është intervenuar vetëm me krypë.
Ndërsa në drejtorinë e kulturës dhe arsimit të kësaj komune thanë se shkolla është ndërtuar në këtë pjesë për shkak se nuk kanë pasur asnjë parcelë në pozitë të rrafshët.
