Nxënësja Jara Kasapolli e shkollës “Asdreni” në Pejë po shquhet për talentin dhe arritjet e saj në fushën e muzikës, duke dëshmuar aftësi si në këndim, ashtu edhe në interpretimin e pianos, shkruan AlbanianEducation.net.
Sipas njoftimit të publikuar nga shkolla, Jara ka marrë pjesë në festivale të këngës për fëmijë, ku ka interpretuar këngët “Dajmed”, “Violinë”, “Fluturat” dhe “Kokrra e Rrushit”.
Përveç këndimit, ajo ka marrë pjesë edhe në gara muzikore të pianos në Kosovë dhe në Tiranë të Shqipërisë, ku ka dëshmuar përkushtimin e saj në zhvillimin e aftësive artistike.
Medaljet, çmimet dhe vlerësimet e fituara ndër vite, sipas shkollës, pasqyrojnë punën e vazhdueshme të nxënëses për kultivimin e talentit muzikor.
Shkolla “Asdreni” ka shprehur krenarinë për arritjet e Jarës, duke vënë në pah rëndësinë e mbështetjes së talenteve të nxënësve dhe krijimit të mundësive për zhvillimin e potencialit të tyre artistik.
Përmes aktiviteteve muzikore, nxënësit kanë mundësi të zhvillojnë kreativitetin, vetëbesimin dhe aftësitë e tyre interpretuese.
Shkolla i ka uruar Jarës suksese të mëtejshme në rrugëtimin e saj muzikor.